Soongava Post
गान्तोक, १२ दिसम्बर: पूर्व सिक्किमको सिङताम बजारदेखि लगभग तीन किलोमीटर उत्तर तर्फ सिरवानीमा टिस्टा नदी पार गर्नका लागि एनएचपीसीद्वारा निर्माण गरिएको ५५ मिटर लामो बेलीब्रिज आज सडक एवं पुल विभागका मन्त्री एनबी दाहालले उद्घाटन गरे।
४ अक्टोबर २०२३ को टिस्टा बाडले यहाँको पुरानो एलडी काजी पुल बगाएपछि केही समय सिरवानीबाट पूर्व र दक्षिण सिक्किमको यातायात ठप्प भएको थियो भने पछिबाट एनएचपीसीले निर्माण गर्दै गरेको ब्यारेजबाट वाहन आवागमन सुचारु गरिएको थियो।
पहिला लेनको अनि पछिबाट एनएचपीसीले अधिग्रहण गरेको पन बिजुली परियोजना -६ प्रोजेक्टको ब्यारेजबाट सार्वजनिक वाहन आवागमनले कार्य सञ्चालनमा बाधा भएपछि एनएचपीसीले २५ मेट्रिक टन क्षमता भएको अस्थायी बेलीब्रिज निर्माण गरेको छ जसबाट आगामी दुई वर्ष आवागमन सुचारु रहने एनएचपीसीका अधिकारीहरूले जानकारी दिएका छन्।
यस स्थानमा सिक्किम सरकारले पनि पुल बनाउने योजना रहेकाले दुई वर्ष बेलीब्रिज चलाइने र यसपछि पनि नयाँ पुल निर्माण पुरा नभए अन्य उपाय अपनाइने बताइएको छ।
नयाँ बेलीब्रिजको उद्घाटन पछि मन्त्री एनबी दाहालले पुल बनाउने एनएचपीसी र निर्माण कार्यमा सहयोगी जयप्रकाश कम्पनीप्रति सरकारको पक्षबाट आभार व्यक्त गरे साथै नागरिक र चालकहरूलाई पुल सञ्चालनका निर्देशहरूलाई पालन गर्न आग्रह पनि गरेका छन्।
About The Author
