Soongava Post
गान्तोक, 30 सेप्टेम्बर: सिक्किम राज्यमा सडक पूर्वाधार विकासलाई लिएर मुख्यमन्त्री पीएस गोलेको अध्यक्षतामा सरकारको महत्त्वपूर्ण बैठक आयोजन भएको छ। मिन्तोगाङमा आज आयोजित बैठकमा सीमा सडक संगठनसँग मिलेर पूर्वाधारका महत्वपूर्ण मुद्दाहरू समाधान गर्ने बारे छलफल भयो।
बैठकमा सडक र पुल मन्त्री एनबी दाहाल, सीमा सडक संगठनका महानिदेशक लेफ्टिनेन्ट जनरल राघु श्रीनिवासन साथै प्रोजेक्ट स्वस्तिकका प्रमुख इन्जिनियर ब्रिगेडियर मनोज गुप्ता लगायत अन्य अधिकारीहरू उपस्थित थिए।
उत्तर सिक्किममा भूस्खलनका संवेदनशील क्षेत्रहरूमा सडक विकास प्रगति गर्ने उद्देश्यले आयोजित बैठकमा मुख्यमन्त्रीका प्रमुख सचिव एसडी ढकाल र सडक एवं पुल सचिव डादुल भोटिया लगायतका अन्य उच्च अधिकारीहरूले पनि भाग लिएका थिए।
बैठकमा महत्वपूर्ण स्थानहरूको संयुक्त निरीक्षण गर्ने निर्णय गरिएको छ जसबाट तात्कालिक र दिगो समाधानका लागि एक समग्र कार्ययोजना तयार गर्न सकिनेछ।
मुख्यमन्त्री गोलेले राज्यभरिका क्षतिग्रस्त सडकहरूलाई शीघ्र मरमति गर्नुपर्ने आवश्यकताको महत्त्वलाई जोड दिए साथै अधिकारीहरूलाई संयुक्त निरीक्षणहरूमा गति ल्याउन र पुनर्प्राप्ति प्रयासहरूलाई चांडै अघि बढाउन आग्रह गरेका छन्।
About The Author
