Soongava Post
गान्तोकः मुख्यमन्त्री पीएस गोलले आज सम्मान भवनमा आगामी आमा सम्मान दिवस को तयारीका लागि समन्वय बैठकको अध्यक्षता गरे। यो विशेष कार्यक्रम आगामी 10 अगस्तको दिन रम्फूमा आयोजना गरिने सरकारले तय गरेको छ।
यो दिन सिक्किमका आमाहरूको निःस्वार्थ माया, त्याग र जीवनभरको योगदानलाई सम्मान गर्न समर्पित बताइएको छ। कार्यक्रम अवधि सरकारले तोकेको मापदण्ड अनुसार योग्य ठहरिएका आमाहरूलाई आमा सशक्तिकरण योजना अन्तर्गत चेक वितरण गरिनेछ। उक्त योजना सिक्किमका आमाहरूको सशक्तिकरण तथा उत्थानमा केन्द्रित रहेको छ।
आज आयोजित बैठकमा मुख्यमन्त्रीले आमाहरूको समाज निर्माणमा रहेको महत्त्वपूर्ण भूमिकालाई विशेष रूपमा उल्लेख गर्दै भने, “आमा केवल पालनपोषण गर्ने मात्र होइन, उनीहरू शिक्षक, मार्गदर्शक र प्रेरणादायी पात्र पनि हुन्। आमाले आफ्ना सन्तानमा करुणा, सहानुभूति र जिम्मेवारीको भाव जगाउने भएकाले यी नै मूल्यहरू भविष्यको पुस्तामा प्रतिबिम्बित भई एक सबल र नैतिक समाजको आधारशिला बन्नेछन्।”
यस अवसरमा मुख्यमन्त्रीले उपस्थित मन्त्रीहरू, विधायक, ओएसडीहरू, सिएलसी अध्यक्षहरू, महिला, बालबालिका, वरिष्ठ नागरिक तथा दिव्याङजन कल्याण विभागका सचिव लगायत सम्बन्धित अधिकारीहरूलाई आ-आफ्नो निर्वाचन क्षेत्रमा विशेष टोली गठन गरी योग्य र वास्तविक लाभार्थीको पहिचान निष्पक्ष र पारदर्शी ढंगले गर्न स्पष्ट निर्देशन दिए। उनले कुनै पनि योग्य आमा छुट्नु नहुने र न्याय तथा ईमानदारीका आधारमा चयन प्रक्रिया सम्पन्न गर्नुपर्ने बताए।
मुख्यमन्त्रीले भनेका छन्, “हामी सबैले ईमानदारी र प्रतिबद्धताका साथ काम गरौँ, जसले गर्दा प्रत्येक योग्य आमालाई उनको निःस्वार्थ योगदानको सम्मान दिलाउन सकियोस्। यो केवल सरकारी कार्यक्रम मात्र होइन, मातृत्वको अमर शक्ति र आत्माको प्रति गरिएको हार्दिक सम्मन हो।”
About The Author
