Soongava Post
गान्तोक, १८ नोभेम्बरः अल ईण्डिया गभरनर्स गोल्डकप खेल्न पहिलोपल्ट सिक्किम आएको रोयल एफसी दुबइ आधा दर्जन गोल खाएर फर्किएको छ। सोमबार पाल्जर स्टेडियममा खेलाइएको तेस्रो क्वार्टर फाइनल खेलमा नर्थ-ईस्ट युनाइटेड एफसीले दुबइको टिमलाई ६-१ गोलको विशाल अन्तर पराजित गरेर सेमिफाइनलका लागि स्थान सुरक्षित गरेको छ।
खेल शुरु भएको १४औं मिनटमा रोयल एफसी दुबइका खेलाडीबाट भएको गल्तीको ओन गोलले पहिलो बढत बनाएको नर्थ-ईस्ट युनाइडेट एफसीलाई सेमिफाइनलमा स्थान बनाउन खटेर म्याच खेल्नपर्ने आवश्यकता नै आइपरेन। लगभग एक पक्षिय खेल खेल्दै नर्थ-ईस्टले हाफ टाइममा ३-० को बडत बनाएको थियो। दोस्रो हाफमा रोयल एफसी दुबइले एक गोल दागेर ३-१ को स्कोर बनाउन सफल भएको थियो तर यसपछि लगातार तीन गोल दागेर नर्थ-ईस्ट युनाइटेड एफसीले यस पल्टको गभरनर्स गोल्डकपमा अहिलेसम्मकै ठूलो स्कोर बनाइदियो।
नर्थ-ईस्ट युनाइटेडको पक्षमा खेलिरहेका गान्तोकका युवा खेलाडी रबिन छेत्रीले टिमको पक्षमा गोल गर्ने केही सुन्दर अवसर सिर्जना गरिदिएर मेन अफ द म्याचको उपाधि जितेका छन्। आज एउटा ठूलो अन्तरले म्याच जितेर सेमिफाइनल पुगेको नर्थ-ईस्ट युनाइटेडले २० नोभेम्बरमा सेमिफाइनल गोकुलम एफसी केरलसँग खेल्नेछ। भोलि मङ्गलबार प्रतियोगिताको अन्तिम क्वार्टर फाइनल चेन्नइन एफसीले चर्च बोइज युनाइटेड नेपालसँग खेल्नेछ। भोलिदेखि रहल तीन म्याच फ्लड लाइटमा खेलाइनेछन्।
About The Author
