Soongava Post
गान्तोक: सिक्किम सरकारको ग्राम विकास विभागको स्वच्छ भारत मिशन (ग्रामीण) ले विद्यालय स्तरदेखिनै स्वच्छता माथि सचेतना ल्याउन कार्यक्रम शुरु गरेको छ। यसै क्रममा आज गान्तोकको जनता भवनमा विभागले गान्तोक जिल्लाका ३६ विद्यालयलाई लिएर सचेतना कार्यक्रमको आयोजना गर्यो।
यस सचेतना कार्यक्रम बारे जानकारी दिंदै ग्राम विकास विभागकी विशेष सचिव तथा स्वच्छता अभियान ग्रामीणकी मिशन डाइरेक्टर बेणु गुरुङले विद्यार्थीहरू नै समाजको संदेशवाहक रहेकोले उनीहरूलाई स्वच्छता माथि जागरुक गराउन शिक्षकहरूका स्वच्छता क्याम्पियनको सचेतना कार्यक्रम आयोजन गरिएको बताइन। यस अभियानमा सामेल शिक्षकहरूको माध्यमबाट विद्यार्थीलाई स्वच्छता सम्बन्धित सबै विषयमा जागरुक गराउने योजना रहेको छ।
पहिलो चरणमा गान्तोक जिल्लाका ३६ सेकेण्डरी र सिनीयर सेकेण्डरी विद्यालयलाई चयन गरिएको छ भने पछि गएर प्राथमिक अनि जुनियर हाइ स्कूलहरूलाई यस कार्यक्रमको सहभागी बनाइनेछ। गान्तोकपछि सिक्किमका अन्य सबै जिल्लाहरूलाई यस अभियानको भागिदारी बनाइने लक्ष्य राखिएको छ।
सिक्किमको ५०औं राज्य वर्षगाँठको अवसरमा राज्यलाई नै स्वच्छ राख्ने विचारले यो कार्यक्रमको आयोजन गर्दै विद्यार्थिहरूलाई स्वच्छतामाथि जागरुक गराइने बेणु गुरुङले जानकारी दिएकी छन्।
About The Author
