Soongava Post
गान्तोक, १४ नोभेम्बर: राष्ट्रिय बाल दिवसको अवसरमा मुख्यमन्त्री पीएस गोलेले देशका पूर्व प्रधानमन्त्री पंडित जवाहरलाल नेहरूलाई श्रद्धाञ्जलि अर्पण गरेका छन्। मुख्यमन्त्री गोलेले मिन्तोगाङ नजिक नेहरूको मुर्तिमा श्रद्धाञ्जली अर्पण गरे साथै यहाँ भेला भएका विद्यार्थीसँग अन्तरक्रिया पनि गरे।
मुख्यमन्त्री पीएस गोलेले आफ्नो फेसबुक पेजमार्फत पनि सिक्किमका बाल-बालिकाहरूलाई बाल दिवसको शुभकामना दिँदै बालबालिकाहरू हाम्रो समाजको मुटुको धड्कन र उज्ज्वल भविष्यको आशा हुन् भनी बताएका छन्। बाल दिवसले स्वतन्त्र भारतका प्रथम प्रधानमन्त्री पण्डित जवाहरलाल नेहरूको दर्शन र मूल्यहरूको सम्झना गराउँछ, जसले युवा दिमागलाई प्रेम, हेरचाह र ज्ञानको साथ पोषित गर्नमा विश्वास गर्थे भनी मुख्यमन्त्रीले भनेका छन्।
हरेक बालकलाई एक सुरक्षित, खुशी र सहयोगी वातावरणमा हुर्कने अवसर प्राप्त हुनुपर्छ किनभने सपना देख्ने र आफ्नो पूर्ण क्षमताको अन्वेषण गर्ने स्वतन्त्रता सबैलाई छ भन्ने मुख्यमन्त्रीको भनाइ छ। सिक्किम सरकार हरेक बालबालिकालाई गुणस्तरीय शिक्षा, स्वास्थ्य सेवा र उनीहरूलाई फस्टाउनको लागि आवश्यक सहयोग सुनिश्चित गर्न प्रतिबद्ध रहेको मुख्यमन्त्रीले बताएका छन्।
About The Author
