Soongava Post
गान्तोक, १ अक्टोबरः अब सिक्किम सरकारका अधिकारीहरूले सरकारी वाहनलाई निजी प्रयोग गर्न पाउने छैनन्। विगत केही समययता सरकारी वाहन निजी प्रयोगमा ल्याउँदा भएका दुर्घटना पछि सरकारले यस सम्बन्धमा कड़ा नियम लागू गर्ने निर्णय लिएको छ।
सरकारी वाहन निजी प्रयोगमा आइरहेको घटना सम्बन्धमा कड़ा पहल गर्दै सिक्किम सरकारको गृह विभागले सरकारी वाहनको दुरुपयोगलाई लिएर कडा दिशानिर्देश जारी गरेको छ। सरकारको गृह विभागले एउटा परिपत्र जारी गरेको छ जसमा सरकारी सवारी साधनहरू वैध ड्राइभिङ इजाजतपत्र वा अधिकृत ड्राइभरहरू भएका नियुक्त अधिकारीहरूले मात्र प्रयोग गर्न पाउने बताइएको छ।
जारी परिपत्रमा भनिएको छ, “अधिकारीहरूले आफ्ना छोराछोरी, आफन्त, साथीहरूलाई वसारपसार साथै ड्राइभिङ सिकाउन सरकारी वाहनहरू प्रयोग गरे कडाइका साथ कार्वाही हुनेछ साथै यस्तो दुरुपयोग पाइ अनुशासनात्मक कार्यवाही हुनेछ।”
परिपत्र अनुसार, “अबदेखि सबै सरकारी अधिकारीहरूले आफ्नो सेवाबाट अवकाश ग्रहण गरेको १५ दिनभित्रमा संलग्न सवारी साधनहरू सम्बन्धित विभागमा बुझाउनु पर्नेछ। यो निर्देशनको पालना नगरे विभागका प्रमुखहरू जिम्मेवार हुनेछन् र सिक्किम सरकारी कर्मचारी आचरण नियम १९८१ अन्तर्गत दोषी अधिकारी विरुद्ध उपयुक्त अनुशासनात्मक कारबाही गरिनेछ।”
विभाग प्रमुख तथा सचिवहरू र जिल्ला अधिकारीहरूलाई यसको कडाइका साथ पालनका लागि आफ्नो प्रशासनिक नियन्त्रणमा रहेका सबै अधिकारीहरूको ध्यानाकर्षण गर्न र गृह विभागमा अनुपालन प्रतिवेदन पेश गर्न निर्देशन दिइएको छ।
About The Author
