Soongava Post
गान्तोक, २८ सेप्टेम्बर: प्रेस क्लब अफ सिक्किम तथा पोजिट्युडको सहयोगमा लोकसभा सांसद कार्यालय सिक्किमले ‘द क्वेस्ट’ टक शृंखला आयोजना गर्ने भएको छ।
यसबारे शनिबार गान्तोकमा आयोजित एक पत्रकार सम्मेलनलाई सम्बोधन गर्दै लोकसभा सांसद डा. इन्द्रहाङ सुब्बाले आगामी ३० सेप्टेम्बरको दिन गान्तोकको मनन केन्द्र स्थित मिनी हलमा उक्त कार्यक्रम हुने तय गरिएको जानकारी दिएका हुन्।
‘द क्वेस्ट’ को यो संस्करण व्यवसाय र उद्यमशीलता’ को विषयवस्तुमा केन्द्रित हुने सांसद सुब्बाले जानकारी गराए। यसको उद्वेश्य युवा एवं स्थानीय प्रतिभालाई उत्प्रेरित गर्ने र नवप्रवर्तनकारी विचारहरूलाई प्रोत्साहन गर्नु रहेको छ।
सिक्किमको गतिशील बजारमा उद्यम शुरु गर्ने र बढाउने बारे अन्तर्दृष्टि साझा गर्न यस श्रृंखलाले प्रमुख उद्यमीहरू र व्यापार विशेषज्ञहरूलाई एकसाथ ल्याउने सांसद सुब्बाको भनाई छ।
यो कार्यक्रम सिक्किम राज्य स्थापनाको ५० वर्षको उत्सवसँग पनि सम्मिलित रहेको जसमा सुनौलो सिक्किम, समृद्ध सिक्किम र समर्थ सिक्किमको माध्यामबाट मुख्यमन्त्री पीएस गोलेको दृष्टिकोणलाई पनि झल्काउने सांसद सुब्बाले पत्रकार सम्मेलनमा जानकारी गराए।
पत्रकार सम्मेलनमा प्रेस क्लब अफ सिक्किमका अध्यक्ष भीम रावत र पोजिट्युडका प्रमुख विजय सुब्बा पनि उपस्थित थिए। यो श्रृंखला मासिक रूपमा आयोजना गरिने बताइएको छ।
About The Author
