Soongava Post
नयाँ दिल्ली, २५ सेप्टेम्बरः सिक्किमका लोकसभा सांसद इन्द्रहाङ सुब्बाले सीम सड़क संगठन (बीआरओ) का महानिदेशक लेफ्टिनेन्ट जनरल रघु श्रीनिवासनसित बैठक गरेर उत्तर सिक्किममा सड़कहरूको गम्भीर अवस्थामाथि चर्चा गरेका छन्। चर्चा विशेष गरेर ३ र ४ अक्टोबर २०२३ को टिस्टा बाड़ र यसले सड़क सम्पर्कलाई पुऱ्याएको क्षतिबारे केन्द्रित थियो।
बैठक अवधि सांसद इन्द्रहाङ सुब्बाले उत्तर सिक्किमका धेरै क्षेत्रको सड़क सम्पर्कमा गम्भीर बाधा भएका कारण मानिसहरूको पहुँच कठिन बनेको जानकारी दिए। स्थानीय समुदाय र राष्ट्रिय सुरक्षाका लागि आवश्यक यी महत्त्वपूर्ण सड़क मार्गको पुनर्वासका लागि ठूलो प्रयास हुनुपर्ने विषयमा उनले जोड दिएका छन्।
सिक्किममा वर्षाको मौसम समाप्त भएका कारण क्षतिग्रस्त सड़कहरूको मरमति कार्यलाई द्रुत गतिमा अघि बढाउनुपर्ने सांसद सुब्बाले आग्रह गरेका छन्। आगामी मनसुन अघि नै सड़क पुनःस्थापना कार्य सुनिश्चित गर्न सीमा सड़क संगठनले कार्यबल बढाउनुपर्ने उनले सुझाउ दिए। उत्तर सिक्किमको भारत चीन सीमालाई जोड्ने यि सड़कको सामरिक महत्त्वबारे पनि उनले सीमा सड़क संगठनका महानिदेशकलाई अवगत गराएका छन्।
उत्तर सिक्किमका यि महत्त्वपूर्ण सड़कहरूको पुनःनिर्माण नभए पहाड़ी क्षेत्रमा सुरक्षा स्थिति कमजोर हुनसक्ने स्थिति छ। यसबारेमा पनि बैठकमा छलफल भएको बताइएको छ।
बैठक अवधि लेफ्टिनेन्ट जनरल श्रीनिवासनले उत्तर सिक्किममा सड़कहरूको मरमति कार्यलाई प्राथमिकता दिइने आश्वासन दिए। उनले आगामी सुखा मौसममा सीमा सड़क संगठनले सड़क मरमति कार्यलाई तीब्रता दिन प्रतिबद्धता व्यक्त गरेका बताइएको छ। यो बैठक नयाँ दिल्लीको सीमा सड़क भवनमा भएको थियो।
उल्लेखनीय छ, गत वर्षको टिस्टा बाड़पछि उत्तर सिक्किममा सड़क सम्पर्क धेरै ठाउँमा बाधित रहेको छ भने सम्पर्क भएका स्थानमा पनि सड़कहरूको अवस्था जीर्ण रहेको छ। मगनबाट टुङ-नागा हुँदै चुङ्थाङ जोड्ने सड़क विगत ११ महिनादेखि ठप्प छ। उत्तर सिक्किममा सड़क सम्पर्क स्थापना नगरिए राज्यको पर्यटन क्षेत्र व्यापक प्रभावित हुनेछ।
About The Author
