Soongava Post
गान्तोक, ७ सेप्टेम्बरः सिक्किम क्रान्तिकारी मोर्चा (एसकेएम) पार्टीको नारीशक्तिले भोलि ८ सेप्टेम्बरमा हिन्दू महिलाहरूको महत्त्वपूर्ण पर्व तीजको अवसरमा सामूहिक उत्सव आयोजन गर्ने भएको छ। एसकेएम नारीशक्तिले सिक्किम राज्यस्तरीय सामूहिक तीज उत्सवका लागि रानीपुल नजिक सरमसामा भव्य तयारी गरिरहेको छ। सिक्किमका सबै जिल्लाबाट महिलाहरूको उपस्थिति रहने उत्सवको तयारीलाई लिएर आज अन्तिम सभा समारोह समितिकी अध्यक्ष सिक्किम विधानसभा उपाध्यक्ष राजकुमारी थापाको उपस्थितिमा आयोजन भयो।
एसकेएम सरकारको सहयोगमा आयोजना हुने राज्यस्तरीय उत्सवमा मुख्यमन्त्री पीएस गोले मुख्य अतिथि रहनेछन्। यस उत्सवलाई लिएर एसकेएम नारीशक्तिले जिल्लास्तरमा नृत्य प्रतियोगिताको आयोजन गरिसकेको छ जसमा प्रथम स्थानमा आउने छवटै जिल्लाका नृत्य टोलीले राज्यस्तरीय उत्सवमा प्रदर्शन गर्ने समारेह समितिकी अध्यक्ष राजकुमारी थापाले जानकारी दिएकी छन्।
एसकेएम नारीशक्तिले कार्यक्रमलाई दुई भागमा विभाजन गरेको छ। दिनको कार्यक्रममा तीज आधारित नृत्य प्रतियोगिता र मुख्यमन्त्रीको सम्बोधन मुख्य आकर्षण रहनेछन्। साँझमा नेपालका कलाकारहरूको उपस्थितिमा साँगीतिक कार्यक्रम पनि समावेश गरिएको उनले जानकारी दिइन। तीजको सामूहिक उत्सवमा मनोरञ्जन साथै तीजको धार्मिक र सामाजिक महत्त्वलाई पनि ध्यानमा राखेर सामोरह आयोजना गरिने अध्यक्ष थापाले जानकारी दिएकी छन्।
तीजको सामूहिक उत्सवको साँस्कृतिक कार्यक्रमका संयोजक डाक्टर मनोज राईले नेपालकी कलाकार तृष्णा गुरुङ साथै स्थानीय कलाकारको प्रस्तुति रहने बताए। यसमा महिला पुलिसको पक्षबाट समूहिक नृत्य पनि समावेश रहेको छ।
About The Author
