Soongava Post
गान्तोक, ३० अगस्तः सिक्किम फुटबल एसोसिएशन (एसएफए) द्वारा अलग सिक्किम प्रीमियर लीग (एसपीएल) आयोजना गर्ने निर्णयमाथि सिक्किमका मुख्यमन्त्री पीएस गोलेले असन्तुष्टि व्यक्त गरेका छन्। एसएफएले हिजो २९ अगस्तका दिन एउटा पत्रकार सम्मेलन आयोजन गरेर सिक्किम प्रीमियर लीगको घोषणा गरेको थियो जसपछि मुख्यमन्त्रीले यसबारे असन्तुष्टि साथै फुटबलको भविष्यलाई लिएर चिन्ता व्यक्त गरेका छन्।
सिक्किममा फुटबललाई बढावा दिने उद्देश्यले फुटबल डभलोप्मेन्ट प्राइभेट लिमिटेडद्वारा एसपीएलको प्रबन्धन अघिबाटै सफलतापूर्वक भइरहेको थियो। यस विषयमा मुख्यमन्त्रीले चिन्ता व्यक्त गर्दै भनेका छन्, “हामी सबैलाई विधितै छ, फुटबल खेलको प्रवर्द्धन गर्न सिक्किम राज्यमा सिक्किम प्रिमियर लिगको व्यवस्थापन फुटबल डेभलपमेन्ट प्राइवेट लिमिटेडले गर्दै आएको छ। यो थाहा हुँदा-हुँदै पनि किन एसएफएले यही ब्यानरमा प्रिमियर लिग आयोजन गर्ने निर्णय लियो भन्नेबारेमा म गम्भीर रुपमा चिन्तित छु।”
एसएफएले गरेको घोषणाले हुनसक्ने सम्भावित भ्रम र विवादलाई लिएर मुख्यमन्त्रीले चिन्ता व्यक्त गरेका छन्। एसएफएको निर्णयले राज्यमा खेलको विकासकालागि आवश्यक सहयोगी प्रयासहरूलाई कमजोर बनाउने मुख्यमन्त्रीको भनाइ छ। फुटबल समुदाय र हितधारकमाझ एकताको महत्त्वमाथि जोड दिंदै सबै पक्षलाई खेलाड़ीहरूको कल्याण र खेलको अखण्डतालाई प्राथमिकता दिन उनले आग्रह गरेका छन्।
About The Author
