Soongava Post
गान्तोक: सिटिजन एक्सन पार्टी (सिएपी) सिक्किमको पाकिम जिल्ला कार्यकारिणी परिषद् अन्तर्गत एक महत्वपूर्ण संगठनात्मक सभा आज रम्फूस्थित पार्टी सर्कल कार्यालयमा सम्पन्न भयो।
पार्टीको प्रेस विज्ञप्तिमा जनाइएअनुसार, जिल्ला अध्यक्ष गजेन्द्र राईको अध्यक्षतामा सम्पन्न उक्त सभामा राज्य परिषद्का सदस्यहरू, जिल्ला र सर्कल तहका पदाधिकारीहरू, साथै विभिन्न स्थानबाट आएका समर्पित कार्यकर्ताहरूको उल्लेखनीय उपस्थिति थियो।
पार्टी अध्यक्ष अनुपस्थित रहे पनि संगठन उपाध्यक्ष किरण जिम्बाले कार्यकर्ताहरूलाई संगठनप्रति जिम्मेवार र समर्पित भई जन–जनमा पार्टीको सन्देश पुऱ्याउन आग्रह गरे। विज्ञप्तिमा उल्लेख गरिएअनुसार, उनले संगठनलाई जनअपेक्षाअनुकूल र जनमैत्री बनाउँदै निरन्तर गतिशीलता कायम राख्नुपर्ने धारणा व्यक्त गरेका थिए।
संगठन सचिव प्रकाश पराजुली, नरेन्द्र अधिकारी र महिला परिषद् संयोजिका सुमति छेत्रीले क्रमशः संगठन सुदृढीकरण, कार्यशैलीमा पारदर्शिता र कार्यकर्ताको मनोबल वृद्धिबारे धारणा राखेको विज्ञप्तिमा उल्लेख छ।
सभा भरि पाकिम जिल्लाका समष्टिहरूको भौगोलिक चुनौती, संगठनात्मक स्वरुप, र जनसम्पर्क सञ्जाल विस्तारबारे गहिरो छलफल भएको बताइएको छ। कार्यकर्ताहरूबाट स्थानीय अनुभव र सुझाव संकलन गर्दै संगठनलाई थप सबल बनाउने दिशा तय गरिएको पनि प्रेस विज्ञप्तिमा जनाइएको छ।
कार्यक्रमको समापनमा पार्टी उपाध्यक्ष (राजनीतिक मामिला तथा समन्वय) भूषण अधिकारीले सभा कुनै व्यक्तिविशेष वा दलको विरोधमा होइन, संगठनलाई अनुशासित र सशक्त बनाउँदै २०२९ को निर्वाचनतर्फ विजयी यात्रामा उन्मुख गराउने साझा उद्देश्यमा केन्द्रित रहेको बताए।
सिएपी सिक्किमको पाकिम जिल्ला कार्यकारिणी परिषद्का अनुसार, यो सभा संगठनात्मक सुदृढीकरण, कार्यकर्ता सशक्तीकरण तथा जनसरोकारप्रति उत्तरदायी भावी कार्यदिशा निर्माणतर्फको एक निर्णायक माइलखुट्टी बन्न सफल भएको छ।
About The Author
