Soongava Post
गान्तोक: सिक्किम र पश्चिम बङ्गाल सरकार बीचको यातायात पारस्परिक सम्झौतासम्बन्धी बैठक आज सिलगढीको स्टेट गेस्ट हाउसमा सम्पन्न भएको छ। बैठकमा सिक्किमबाट विभागीय सल्लाहकार मदन सिञ्चुरीले प्रतिनिधित्व गरेका थिए भने पश्चिम बङ्गालबाट मुख्य रूपले परिवहन विभागका प्रभारी मन्त्री, मेयर, उप मेयर, प्रहरी आयुक्त, सचिव परिवहन विभाग र आरटीओ र अन्य उच्च अधिकारीहरूको उपस्थिति रहेको थियो। सिक्किमबाट यातायात विभागका सल्लाहकार मदन सिञ्चुरीसहित विभागीय सचिव, उप सचिव, र आरटीओ मुख्यालयका प्रतिनिधिहरू बैठकमा सहभागी बने। बैठकमा प्रमुखत: दुवै राज्यबीच उत्पन्न विभिन्न यातायात समस्याहरू र समाधानका उपायहरूबारे गहिरो छलफल गरिएको थियो। विशेष गरी, पश्चिम बङ्गालमा कुद्ने सिक्किमका वाहनहरूप्रति हुने उत्पीडन र अन्य समस्याहरूलाई मुख्य रूपमा उठाउँदै दुवै पक्षले सहमति र समन्वयको महत्त्वमा जोड दिएका छन्। यस अतिरिक्त प्रति हस्ताक्षर (काउन्टर साइन) प्रक्रियामा सुधार र दुवै राज्यका यातायात व्यवस्थामा उत्पन्न समस्याहरूको समाधानका लागि प्रभावकारी उपायहरूमा पनि चर्चा भएको थियो। यातायातको सहजता र आपसी सहयोगका लागि दुवै राज्यका सम्बन्धित अधिकारीहरूले अझ बढी संवाद र समन्वयको आवश्यकता औँल्याएका छन्। यस बैठकले दुवै राज्यबीचमा यातायात सम्बन्धलाई थप मजबुत बनाउनका लागि महत्वपूर्ण कदम चाल्ने आधार तयार गरेको छ। बैठकमा दुवै पक्षले आपसी समझदारीको निर्माण र यात्रु तथा वाहनहरूको सुरक्षा र सुविधाका लागि थप प्रयास गर्ने प्रतिबद्धता जनाएका छन्।
About The Author
