Soongava Post
गान्तोक: ५० वर्षको राज्य उत्सवको एक ऐतिहासिक घटनाको रूपमा दक्षिण सिक्किमको याङयाङले आगामी १२ देखि १४ अप्रेलसम्म अन्तर्राष्ट्रिय युवा सम्मेलन आयोजना गर्न गइरहेको छ। यो सम्मेलनले युवा व्यवसायी, पर्यटन विशेषज्ञहरू र विश्वव्यापी प्रतिनिधिहरूलाई एकसाथ ल्याएर क्षेत्रको पर्यटनको भविष्य र सिक्किमको आर्थिक वृद्धिमा यसको भूमिकाबारे छलफल गर्ने बताइएको छ। सरकारी निकायहरू, प्रमुख सरोकारवालाहरू समर्थनमा याङयाङ पर्यटन विकास समिति (वाई.टी.डी.सी.) द्वारा आयोजना गरिने यो कार्यक्रमले याङयाङलाई एक प्रमुख पर्यटन गन्तव्यको रूपमा स्थापित गर्ने लक्ष्य राखेको छ। याङयाङ निर्वाचन क्षेत्रकी विधायक तथा सिक्किम विधानसभा उपाध्यक्ष राजकुमारी थापाको नेतृत्वमा तयारीहरू पूर्ण गतिमा छन्, जसमा शहरको आकर्षण बढाउने सौन्दर्यीकरण प्रयासहरू पनि समावेश छन्।
उपाध्यक्ष राजकुमारी थापाले सम्मेलनको महत्त्वलाई जोड दिँदै याङयाङ एक प्रमुख पर्यटन गन्तव्यको रूपमा उदाउँदै गरेको र यो सम्मेलनले यसको पूर्ण सम्भावना उजागर गर्ने जानकारी दिएकी छिन्। दिगो पर्यटनलाई केन्द्रमा राखेर स्थानीयहरूलाई पर्यटन वृद्धिसँगै फस्टाउने वातावरण सिर्जना गर्नमा ध्यान केन्द्रित गरिएको छ। सम्मेलनले सिक्किमको दिगो पर्यटनप्रतिको प्रतिबद्धतालाई प्रदर्शन गर्ने र मुख्यमन्त्री प्रेम सिंह तामाङद्वारा शुरु गरिएका प्रमुख पहलहरू जस्तै धप्परदेखि भालेढुङ्गा रोपवे, स्काईवाक विकास, र इको-पर्यटन परियोजनाहरूलाई हाइलाइट गर्ने उनले बताएकी छिन्। विधानसभा उपाध्यक्षले सरकारको दृष्टिकोणलाई दोहोर्याउँदै पर्यटन सधैं प्राथमिकतामा रहेको र दिगो विकासमा केन्द्रिय भूमिका खेल्ने र आर्थिक वृद्धि सुनिश्चित गर्दै राज्यको समृद्ध सम्पदाको संरक्षण गर्ने बताइन।
तीन दिनको यस सम्मेलनमा विभिन्न गतिविधिहरू समावेश हुनेछन्। यसमा सम्पदा क्षेत्रहरूको पैदल यात्रा, सांस्कृतिक र्याली, प्यानल छलफल, पर्यटन विशेषज्ञहरूसँग अन्तरक्रियात्मक सत्रहरू, उद्योग पेशेवरहरूद्वारा स्थलगत वार्ताहरू र सांस्कृतिक आदान-प्रदान कार्यक्रमहरू सामेल रहने बताइएको छ। यी संलग्नताहरूले स्थानीय संस्कृति, सम्पदा, र वातावरणीय अखण्डताको संरक्षणमा केन्द्रित रहँदै आर्थिक विकासलाई बढावा दिने विश्वास राखिएको छ।
वाई.टी.डी.सी.की अध्यक्ष तथा प्रवक्ता रञ्जिता गुरुङले सम्मेलनको प्रभावलाई उजागर गर्दै उनीहरूको मिशन स्थानीय समुदायहरूलाई फाइदा पुर्याउने दिगो पर्यटन मार्गहरू सिर्जना गर्नु र सिक्किमको सांस्कृतिक सम्पदाको संरक्षण गर्नु रहेको बताइन्। सम्मेलन केवल एक आयोजनाभन्दा बढी भएको बताउँदै गुरुङले यसलाई थप समावेशी, नवीन, र पर्यावरण-सचेत पर्यटन उद्योगतर्फको आन्दोलनको रूपमा लिइने बताएकी छिन्।
About The Author
