Soongava Post
गान्तोक: सिक्किम सरकारको नियमितीकरण योजनाअन्तर्गत हालै नियमित गरिएका कर्मचारीहरूका लागि राहतको खबर आएको छ। सरकारले तलब म्याट्रिक्सको स्तर १, २, र ३ मा रहेका कर्मचारीहरूलाई आश्वस्त करियर प्रगतिसँग सम्बन्धित (ACPS) आर्थिक उन्नतिको लाभ प्रदान गर्ने निर्णय गरेको छ।
सिक्किम सरकारको कार्मिक विभागद्वारा जारी गरिएको कार्यालय ज्ञापनअनुसार, ACPS तीन-स्तरीय आर्थिक उन्नतिको सुविधा प्रदान गर्ने योजना हो। यसलाई पहिलोपटक कार्यालय ज्ञापन संख्या M(161)/6908/GEN/DOP मिति २५.०४.२०११ मार्फत शुरु गरिएको थियो। यो योजना १८ नोभेम्बर २००९ देखि लागू भएको थियो।
तर योजना शुरु भएको समय तलब म्याट्रिक्सको स्तर १, २, र ३ (तदनुसार ग्रेड पे रु. १४००, रु. १८००, र रु. २३००) समावेश थिएनन्। यी स्तरहरू अस्थायी कर्मचारीहरूको नियमितीकरण योजनाअन्तर्गत पछि मात्र लागू गरिएका थिए।
नयाँ ज्ञापनअनुसार, स्तर १, २, र ३ मा नियमित गरिएका कर्मचारीहरूलाई पाँच वर्ष पूरा भएपछि उनीहरूको मूल तलब स्तर पुनःस्थापित गरिन्छ। सरकारको नयाँ निर्णयअनुसार, नियमितीकरण वा नियुक्तिको मितिबाट १० वर्ष सेवा अवधि पूरा गरेपछि उनीहरूलाई ACPS अन्तर्गत आर्थिक उन्नतिको सुविधा प्रदान गरिनेछ।
About The Author
