Soongava Post
दार्जीलिङ: जीटीएका प्रमुख कार्यपाल अनित थापाले दार्जीलिङ र कालेबुङ जिल्लामा जिल्ला परिषद गठन गर्न राज्य सरकारसँग माग गरेका छन्। यस विषयमा उनले आज पञ्चायत तथा ग्रामीण विकास विभागका मन्त्री प्रदीप मजुम्दारसँग भेटवार्ता गरेका छन्। बैठकमा विभागका सचिव डा. उलागानाथन पनि उपस्थित थिए।
थापाले भेटका क्रममा मन्त्रीलाई जीटीए क्षेत्रअन्तर्गत दार्जीलिङ र कालेबुङ जिल्लामा जिल्ला परिषदको अभावले स्थानीय जनताको लोकतान्त्रिक अधिकारमा ठूलो खाडल पारेको उल्लेख गर्दै तत्काल परिषद गठनका लागि आग्रह गरे। उनका अनुसार, “हाल जीटीए क्षेत्रमा दुईस्तरीय पञ्चायत व्यवस्था मात्र छ, जसका कारण जनताको प्रतिनिधित्वलाई प्रभावकारी बनाउन जिल्ला परिषद आवश्यक छ।”
अनित थापाले मन्त्रीलाई बुझाएको ज्ञापनपत्रमा परिषद स्थापनाका लागि सरकारलाई चाँडो निर्णय लिन आग्रह गरिएको छ। साथै परिषद सञ्चालनका लागि आवश्यक पूर्वाधार तथा कर्मचारी व्यवस्था सुनिश्चित गर्न र शीघ्र चुनाव गराई जनताको प्रतिनिधि आवाज निर्णय प्रक्रियामा समावेश गराउन माग गरिएको छ।
जीटीए प्रमुख थापाले मन्त्रीसँगको छलफल सौहार्दपूर्ण र सकारात्मक रहेको जानकारी दिएका छन्।
About The Author
