सिक्किमलाई जोड्ने राष्ट्रिय राजमार्ग 10 को स्तरोन्नति कार्य जारी

गान्तोक: सिक्किम र सिलगढीबीचको यातायात सहज बनाउन केन्द्र सरकारले राष्ट्रिय राजमार्ग (NH)10 को स्तरोन्नतिको लागि विभिन्न योजनाहरू अघि बढाएको छ। यो विषयमा सडक परिवहन तथा राजमार्ग मन्त्री नितिन गडकरीले 13 फरवरीमा लोकसभामा सिक्किमका सांसद इन्द्र हाङ सुब्बाको प्रश्नको लिखित जवाफ दिँदै जानकारी दिएका हुन्।
सांसद सुब्बाले सिक्किमलाई जोड्ने मुख्य मार्ग NH-10 को स्तरोन्नति सम्बन्धी केन्द्र सरकारको योजनाबारे जानकारी मागेका थिए। जवाफमा मन्त्री गडकरीले बलासन पुलदेखि सेवोक आर्मी क्यान्टोनमेन्ट खण्डलाई 4 /6 लेनमा विस्तार गर्ने, सेवोक आर्मी क्यान्टोनमेन्टदेखि कोरोनेसन पुलसम्म 4 लेनको विस्तृत परियोजना प्रतिवेदन (DPR) तयार पार्ने, सेवोकदेखि रम्फू खण्डलाई 2 लेन हार्ड शोल्डरसहित चौडा पार्ने, रम्फूदेखि रानीपुल खण्डलाई पनि 2 लेनको सडक विस्तार गर्ने तथा रानीपुलदेखि गान्तोक खण्डसम्मको मर्मत सम्भारका लागि प्रदर्शन-आधारित अनुबन्ध (Performance Based Maintenance Contract) जस्ता महत्वपूर्ण कार्यहरू अघि बढाइरहेको जानकारी दिएका छन्।
सेवोकदेखि गान्तोकसम्मको सम्पूर्ण NH-10 को मर्मत र स्तरोन्नतिको जिम्मा केन्द्र सरकारको उपक्रम NHIDCL लाई दिइएको छ।
सिक्किमका सांसद इन्द्र हाङ सुब्बाले केन्द्र सरकार र सडक परिवहन तथा राजमार्ग मन्त्रालयलाई सिक्किमको सडक पूर्वाधार आवश्यकतालाई प्राथमिकता दिएकोमा आभार व्यक्त गरेका छन्। उनले सिक्किमका मुख्यमन्त्री पीएस गोले र केन्द्र सरकारबीचको राम्रो सम्बन्धकै कारण सिक्किमका विकास योजनाहरूमा केन्द्रको ध्यान गएको बताएका छन्। सुब्बाले यी सबै कार्यहरू सम्पन्न भएपछि सिक्किमको पर्यटन क्षेत्र र पूर्वाधार विकासमा ठूलो लाभ पुग्ने विश्वास व्यक्त गरेका छन्।

About The Author

Soongava Post

New digital media platform based in Sikkim.

See author's posts