Soongava Post
सिलगढ़ी: सिक्किमका मुख्यमन्त्री पीएस गोलेले शुक्रबार बिहान सिक्किमबाट उपचारका लागि सिलगढ़ी आसपासका अस्पतालमा आउने बिरामीहरूको सहयोगार्थ ‘आमा को गोद’ सु-स्वास्थ्य निवासको उद्घाटन गरे।
सिलगढ़ीको चम्पासारीस्थित यो स्वास्थ्य-लजिस्टिक सहयोग केन्द्र हालका लागि भाडामा लिइएको भवनमा सञ्चालन शुरु गरिएको छ। यस केन्द्रको व्यवस्थापन सिक्किम क्रान्तिकारी मोर्चा (एसकेएम) पार्टी अन्तर्गत गरीब जनकल्याण प्रकोष्ठको निगरानीमा रहनेछ।
यो अतिथि गृह बिरामी र उनीहरूका परिवारका सदस्यहरूका लागि ठूलो राहत हुने मुख्यमन्त्री गोलेले विश्वास व्यक्त गरेका छन्। साथै यो पहल सरकारको नागरिकहरूको कल्याणप्रति रहेको प्रतिबद्धताको प्रतीक भएको बताएका छन्।
“सरकार गठन भएदेखि नै हामीले स्वास्थ्य सेवा क्षेत्रमा विशेष प्राथमिकता दिएका छौं। बिरामी परेर उपचार गर्न घर बाहिर जानु पर्दा हाम्रा जनताले कुनै असुविधा भोग्न नपरोस् भन्ने उद्देश्यले यो सुविधा सञ्चालनमा ल्याइएको हो,” मुख्यमन्त्री गोलेले भनेका छन्।
मुख्यमन्त्रीले गरीब जनकल्याण प्रकोष्ठका प्रमुख संरक्षक प्रभाकर गोलेको नेतृत्वमा कार्यरत सम्पूर्ण स्वास्थ्यकर्मी तथा सहयोगी टोलिको सराहना गरेका छन्। बिरामीहरूलाई समयमै उचित सेवा र आत्मीयता प्रदान गर्न प्रकोष्ठमा रहेका सबैको मेहनत महत्वपूर्ण रहेको मुख्यमन्त्रीले उल्लेख गरेका छन्।
भविष्यमा यो केन्द्रको स्तर वृद्धि गरी थप सुविधा सम्पन्न बनाउने योजना सरकारको रहेको साथै सिक्किम सरकार स्वास्थ्य सेवा पहुँचलाई अझ प्रभावकारी बनाउन निरन्तर लागिरहने मुख्यमन्त्रीले प्रतिवद्धता पनि व्यक्त गरेका छन्।
About The Author
