Soongava Post
गान्तोक: सिक्किममा घरभाडामा बस्ने मानिसहरूको भेरिफिकेशनलाई लिएर सिर्जना भएको अन्योलतालाई सिक्किम पुलिसले केही साम्य गराएको छ। मंगलवार सिक्किम पुलिसले पत्रकार सम्मेलन गरेर सिक्किम सब्जेक्ट, सीओआई, आरसी, जमिन पर्चा र सिक्किमको भोटर कार्ड भएका सिक्किमे बासिन्दाहरूले कुनै पनि प्रकारको भेरिफिकेशन गर्नु नपर्ने स्पष्ट पारेको छ।
सिक्किम पुलिसका महानिदेशक अक्षय सचदेवाले आज आयोजित पत्रकार सम्मेलनमा सिक्किम सब्जेक्ट, सर्टिफिकेट अफ आइडेन्टिफिकेसन (सीओआई), रेसिडेन्शियल सर्टिफिकेट (आरसी), जमीनको पर्चा र सिक्किमको भोटर कार्ड भएका सिक्किमे बासिन्दाहरूले कुनै पनि प्रकारको भेरिफिकेशन गर्नु नपर्ने जानकारी गराएका छन्।
यी पाँच प्रकारका मध्ये कुनैपनि एउटा कागजात भएका व्यक्तिहरूले पुलिस स्टेशनमा किरायदार प्रमाणीकरणको लागि दर्ता गर्नु नपर्ने जानकारी गराएका छन्। किरायदार प्रमाणीकरण सम्बन्धि चाँडै नै नयाँ अधिसूचना जारी गरिने पनि पुलिस महानिर्देशकले जानकारी गराएका छन्।
सिक्किममा बसोबास गर्दै आएका मानिसहरूसँग सरकारद्वारा तोकिएका उक्त कागजात नभएका किरायदारको भने पुलिस स्टेशनमा प्रमाणीकरण गर्नेपर्छ। स्थानीय वासिन्दा र राज्यको आन्तरिक सुरक्षाका लागि किरायदारको प्रमाणीकरण महत्त्वपूर्ण रहेको र यसलाई लागू गर्दा कतिपय शुरुआती समस्या देखिनु सामान्य विषय रहेको बताउँदै पुलिस महानिदेशक अक्षय सचदेवा समस्याहरूलाई कानुन संशोधनको समय सम्बोधन गर्न सकिने बताएका छन्।
यता पुलिस स्टेशनमा प्रमाणीकरण गराउनेको भीड लगातार बडेका कारण यसलाई व्यवस्थित गर्न आगामी केही दिनभित्रै पुलिस आउट पोष्टहरूमा पनि यो प्रक्रिया सञ्चालन गरिने उनले बताउ। पुलिस महानिदेशक सचदेवाले किरायदार प्रमाणीकरण प्रक्रिया एकपल्ट पूरा भइसकेपछि सरकारमा किरायदारको डेटाबेस उपलब्ध हुने विश्वास व्यक्त गरेका छन्।
About The Author
