Soongava Post
कोहिमा, २ दिसम्बर : नागाल्याण्ड राज्यको महापर्व “हर्नबिल फेस्टिवल २०२४” आइबारदेखि शुभारम्भ भयो। नागाल्याण्डका , मुख्यमन्त्री नेफियो रियोको उपस्थितिमा शुभारम्भ भएको कार्यक्रममा सिक्किम अनि तेलंगाना को-पार्टनर राज्य रहेका छन्। पद्मभूषण ए.आर. रहमान, जापान, पेरु, भल्गेरिया, युके अनि संयुक्त राज्य अमेरिका जस्ता सहयोगी देशका प्रतिनिधिहरू लगायत देश-विदेशबाट आएका वरिष्ठ हस्तीहरूको कार्यक्रममा उपस्थिति रहेको थियो।
उद्घाटन कार्यक्रमलाई संक्षिप्त रूपमा सम्बोधन गर्दै नागाल्याण्डका मुख्यमन्त्री नेफियो रियोले जनजातिहरूको संस्कार, परम्परालाई प्रदर्शित गर्ने यस महोत्सवमा राज्यका सबै नागरिकहरूलाई हर्नबिल फेस्टिवलको २५औँ वर्ष पूरा गरेकोमा बधाई दिए।
नागाल्याण्ड पर्यटन विभागद्वारा आयोजित २५औँ हर्नबिल फेस्टिवल २०२४-मा सिक्किम को-पार्टनर राज्य रहेको छ भने सिक्किमका लगभग १४२ प्रतिनिधि टोलीले यस महोत्सवमा सिक्किमको समृद्ध संस्कार, परम्परा, संस्कृतिलाई यहाँ झल्काउनेछ। नागाल्याण्डको राजधानी कोहिमादेखि १२ किलोमिटर टाढ़ोमा अवस्थित किसामा हेरिटेज भिलेजमा आजदेखि शुरु भएको यस अन्तर्राष्ट्रिय स्तरको यस महोत्सव आगामी १० दिसम्बरसम्म चल्नेछ।
मुख्य रूपले नागा जनजातिको समृद्ध संस्कृतिको सम्बर्द्धन अनि प्रवर्द्धन गर्दै विश्वसामु पेश गर्ने उद्देश्यले २०००-देखि शुरु गरिएको यस हर्नबिल फेस्टिवल आज अन्तर्राष्ट्रिय तहमै ध्यान आकर्षित गराउन सफल बनेको छ। यस महोत्सवमा भारतसँगै विश्वभरिबाटै मानिसहरू आउने गर्छन् अनि यस महोत्सवमार्फत नागा जनजातिसँगै कुकी, कचरी, गारो अनि मिकिर जनजातिलाई पनि नागाल्याण्डको मूल निवासीको रूपमा पञ्जीकृत गरिएको छ। यी सबै जनजातिले यस महोत्सवमा आफ्नो समृद्धि संस्कृतिलाई प्रदर्शन गर्ने गर्छन्। नागाल्याण्डको चर्चित हर्नबिल फेस्टिभलमा यस पल्ट गोर्खा समुदायले पनि आफ्नै खानपानको बिक्री र सांस्कृतिक प्रदर्शनीको अवसर पाएका छन्।
About The Author
