Soongava Post
गान्तोक, २३ अक्टोबर: नर्थ ईस्ट टिम चेस च्याम्पियनशिपमा असम विजयी बनेको छ। सिक्किम चेस एसोसिएसनले पहिलो पल्ट यो प्रतियोगिता गान्तोकमा आयोजन गरेको थियो। २१ अक्टोबरदेखि गान्तोकको जनता भवनमा आयोजन भएको प्रतियोगिता बुधबार समाप्त भएको छ। यसमा अरुणाचल प्रदेशको टिम दोस्रो र मेघालय तेस्रो बनेको छ। प्रतियोगितामा पूर्वोत्तरबाट मिजोरम राज्यको अनुपस्थित कारण सिक्किमको दुईवटा टिमले भाग लिएको थियो भने सिक्किमको टिमले छैटौं स्थान प्राप्त गरेकाे छ।
पहिलो पल्ट आयोजित टिम चेस च्याम्पियनशिपमा विजयी टिमलाई आयोजक सिक्किम चेस एसोसिएशनले दुई लाख रुपियाँको नगद पुरस्कार प्रदान गरेको छ। उपविजेता टिमले डेढ लाख रुपियाँ र तेस्रो स्थानमा आउने टिमले एक लाख रुपियाँ पुरस्कार राशि प्राप्त गरेका छन्।
सिक्किममा पूर्वोत्तर क्षेत्रका राज्यहरूलाई लिएर टिम च्याम्पियनशिप आयोजना गर्दा राज्यका नव प्रतिभाशाली खेलाडीले धेरै फाइदा पाएको सिक्किम चेस एसोसिएशनका महासचिव महेन्द्र ढकालले जानकारी दिएका छन्। सिक्किमका दुई राम्रा खेलाडीले यस प्रतियोगितामा सहभागिता दिन नसकेको भएपनि राज्यका खेलाडीहरूले गरेको प्रदर्शन राज्यको चेस भविष्यका लागि आशाजनक रहेको उनले बताए।
नर्थ ईस्ट टिम चेस च्याम्पियनशिपको समापन अवसरमा उपस्थित रहेका साउथ एसियन चेस काउन्सिलका अध्यक्ष धर्मेन्द्र कुमारले विगत दश वर्षमा पूर्वोत्तर क्षेत्रका खेलाडीले चेसमा राम्रो प्रगति गरिरहेको बताए। पहाडी क्षेत्र भएको कारण पूर्वोत्तरमा चेस खेलको विकासमा धेरै कठिनाइ रहेपनि खेलमा भइरहेको प्रगतिलाई उनले सन्तोषजनक बताएका छन्। अध्यक्ष धर्मेन्द्र कुमारले सिक्किम चेस एसोसिएशनको पक्षबाट प्रस्ताव आएको खण्डमा सहयोगमा हात बढाउने बताए।
About The Author
