Soongava Post
गान्तोक, ६ सेप्टेम्बरः मगन जिल्लामा ग्लेशियल लेक आउटब्रस्ट फ्लड अथवा हिमताल फुटेर हुने बाढ़ (जीएलओएफ) माथि अध्ययन गर्न गएको ३५ सदस्यीय अभियान टोली शुक्रवार गुरुदोङमार पुगेको छ । सिक्किम सरकारको विज्ञान तथा प्रविधि विभाग र सिक्किम राज्य आपदा प्राधिकरणको आयोजनामा अध्ययन टोली १ सेप्टेम्बरका दिन उत्तर सिक्किम गएको थियो।
अध्ययनका लागि गुरुदोङमार ताल पुगेपछि अभियान शुरु गर्नअघि लाचेन गुम्बाका लामाहरू र लाचेन जुम्साका प्रतिनिधिको उपस्थितिमा अभियान टोलीले परम्परागत आधारमा पूजा प्रार्थना आयोजन गरेर गुरु रिम्पोछेको आशीर्वाद लिए।
अभियान टोलीले १८,००० फुट उचाइमा रहेको खाङ्चुङ छो तालको प्रारम्भिक मूल्याङ्कन पनि गरेको छ जुन सिक्किमको सबैभन्दा ठूलो ताल हो। यस हिमतालको लम्बाइ ३ किलोमिटरभन्दा बढी छ।
टिस्टा खाङ्त्से ग्लेशियरबाट भरिने गरेको खाङ्चुङ छो ताल तीव्र गतिमा बढिरहेको छ। यो हिमताल अन्तर्राष्ट्रिय सिमानाबाट मात्र ५०० मिटरको दूरीमा अवस्थित छ।
अभियान टोलीले भोलि ७ सेप्टेम्बरको दिन यो हिमताल साथै शाको छो तालको पनि विस्तृत अध्ययन गर्ने योजना बनाएको छ। यस अन्तर विभागीय अभियान टोलीले आगामी १४ सेप्टेम्बरसम्म मगन जिल्लाको उच्चाइका क्षेत्रमा रहेर कूल ६ वटा हिमतालको जोखिम र यसबाट हुने खतरा न्यूनिकरण बारे अध्ययन गर्ने योजना रहेको छ।
About The Author
