Soongava Post
गान्तोक, ५ सेप्टेम्बरः सिक्किमका सरकारी महाविद्यालयबाट प्रोफेसर पदमा प्रोन्नत भएकी प्रो डा नम्रता तामाङ (थापा) लाई नरबहादुर भण्डारी सरकारी महाविद्यालय तादोङले गुरु-गौरव सम्मान प्रदान गऱ्यो। महाविद्यालले आफ्नो स्थापना दिवस तथा शिक्षक दिवसको अवसरमा कलेजले यस वर्षदेखि स्थापना गरेको पहिलो गुरु-गौरव सम्मान डा नम्रता तामाङलाई प्रदान गरेको हो। सम्मान प्राप्त गरेपछि उनले भनिन्, “आफ्नाहरूले गरेको सम्मान मेरा लागि नोबेल पुरस्कारभन्दा महत्त्वपूर्ण हो ।”
धेरै वर्षको अन्तरालपछि गत वर्षदेखि प्रारम्भ गरिएको महाविद्यालय स्तरीय शिक्षक दिवसको अवसरमा प्राचार्य डा देवव्रत पुरोहित प्रमुख अतिथिका रूपमा उपस्थित थिए। उनले आफ्नो सम्बोधनमा आजको प्राविधिक उन्नति र प्रगतिको पराकाष्ठ समयमा गुरुको भूमिका चुनौतिपूर्ण रहनाका साथै साहसिक रहेको बताए । शिक्षण व्यवसाय चाहेर हुने नभई चुनेर मात्र पाइने उल्लेख गरे।
शिक्षक प्रतिनिधिका रूपमा आफ्नो मन्तव्य राख्दै डा प्रमिला छेत्रीले कलेजमा विद्यार्थीहरूले शिक्षकका लागि देखाएको सौहार्दताले अभिभूत बनाएको र शिक्षक-शिष्यको सुमधुर सम्बन्धले राष्ट्रको विकासमा महत्त्वपूर्ण भूमिका निर्वाह गर्ने बताइन् ।
नेपाली विभागका विभागाध्यक्ष डा उदय छेत्रीले गुरु-गौरव सम्मान स्थापनाको औचित्यमाथि प्रकाश पार्दै प्राचार्यको उदार भावकै कारण यो कार्यक्रम र गुरु-गौरव सम्मानको परिकल्पनाले साकार रूप पाउन सफल भएको बताए।
महाविद्यालयको पहिलो गुरु- गौरव सम्मानकी प्रापक प्रोफेसर डा नम्रता तामाङ थापाले उक्त सम्मानले आफूमाथि ठुलो उत्तरदायित्व सुम्पेको र आफू यसबाट उऋण हुननसक्ने बताउँदै आफ्नो कार्यस्थल तथा घरले यसरी सम्मान गर्दा हर्षविभोर बनेको बताइन् । आफ्नो कामप्रति निष्ठापूर्वक लगनशील भए अवश्य सम्मानित हुने विश्वास लिएर अध्ययन अध्यापन गर्ने सद्विचार साझा गरिन् । कार्यक्रममा लिम्बू, भोटिया र नेपाली विभागका विद्यार्थीहरुले नृत्य र कविता प्रस्तुत गरेका थिए।
-प्रेस विज्ञप्तिबाट
About The Author
