Soongava Post
गान्तोक: सिक्किम डेमोक्रेटिक फ्रन्ट (एसडीएफ) पार्टीले सत्तारुढ सिक्किम क्रान्तिकारी मोर्चा (एसकेएम) सरकारमाथि लोकतान्त्रिक मूल्य र मान्यता संकटमा पारेको गम्भीर आरोप लगाएको छ। एसडीएफ पार्टीका उपाध्यक्ष (प्रचार प्रसार) कृष्ण खरेलद्वारा जारी प्रेस विज्ञप्तिमा सरकारले विपक्षी दल र सरकारसँग असहमति राख्ने व्यक्तिमाथि बारम्बार आक्रमण गरेको, प्रशासनले पक्षपातपूर्ण व्यवहार देखाएको र कानुनी शासन कमजोर भएको दाबी गरिएको छ।
एसडीएफले विगतमा एसकेएमलाई विपक्षमा रहँदा सडक अवरुद्ध गर्ने, हिंसात्मक गतिविधि गर्ने र अलोकतान्त्रिक बयान दिएको स्मरण गराउँदै अहिले सत्तामा आएपछि पनि त्यस्तै व्यवहार दोहोरिएको बताएको छ।
विज्ञप्तिमा एसडीएफ अध्यक्ष पवन चामलिङमाथि हमला, विद्यार्थी नेता पदम गुरुङको ‘हत्या’, पूर्व विधानसभा अध्यक्ष केएन राईमाथि आक्रमणको प्रयासलगायतका घटनालाई उदाहरणका रूपमा प्रस्तुत गरिएको छ।
हालै राजधानी गान्तोकमा विपक्षी नेताहरूमाथि भएको अभद्र व्यवहार र प्रशासनको पक्षपाती भूमिकाप्रति आपत्ति जनाउँदै एसडीएफले यस्ता घटनामा संलग्न दोषीमाथि कडा कारबाहीको माग गरेको छ। एसडीएफले सिक्किम सरकारलाई संवैधानिक अधिकारको रक्षा गर्न, भिजिलान्ते आक्रमण रोक्न र स्वस्थ लोकतन्त्र कायम गर्न आग्रह गरेको छ।
About The Author
