Soongava Post
गान्तोक: उत्तर-पूर्वी राज्यहरूमा कृषि र बागवानीको मूल्य शृङ्खला र बजार सम्पर्कका कमजोरीहरू सम्बोधन गर्न सिक्किमका मुख्यमन्त्री पीएस गोलेको संयोजकत्वमा एक उच्चस्तरीय कार्यदल (HLTF) गठन गरिएको छ। ७२औं एनईसी बैठकको निर्णयअनुसार गठित यो कार्यदलको पहिलो बैठक ७ अप्रेलमा २०२५ मा गान्तोकको सम्मान भवनमा भिडियो कन्फरेन्समार्फत सम्पन्न भएको थियो। मुख्यमन्त्री गोलेले उत्तर-पूर्वमा कृषिको अपार सम्भावना रहेको तर अपर्याप्त पूर्वाधार, प्रशोधन इकाईको अभाव, छरिएको जमिन, कमजोर बजार सम्पर्क र प्रविधिको पहुँच सीमितताले चुनौती खडा गरेको बताए। उनले छुट्टै नीति र आठवटै राज्यको सहभागिताको प्रस्ताव गरेका छन्।
अरुणाचल प्रदेश, असम र त्रिपुराका मुख्यमन्त्रीहरूले पनि आ-आफ्ना राज्यका समस्याहरू उजागर गरेका थिए। केन्द्रिय मन्त्री ज्योतिरादित्य सिन्धियाले मुख्य मुद्दाहरू पहिचान गरी छोटो र दीर्घकालीन लक्ष्य निर्धारण गर्न सुझाएका छन्। कार्यदलको अर्को बैठक अप्रेल महिनाको अन्त्यमा हुने बताइएको छ।
About The Author
