Soongava Post
गान्तोक: फुटबल डेभलपमेन्ट प्राइभेट लिमिटेडले आयोजना गर्दै आएको सिक्किम प्रिमियर लिगको तेस्रो संस्करण आगामी १० अप्रेल देखि शुरु हुने भएको छ। फुटबल डेभलपमेन्ट प्राइभेट लिमिटेडको बोर्ड अफ् डाइरेक्टरका सदस्यहरूले शनिबार पत्रकार सम्मेलन आयोजन गरेर सिक्किम प्रिमियर लिग तेस्रो सिजनको घोषणा गरेका छन्।
लिग नाम्चीको भाइचुङ स्टेडियम र गान्तोक पाल्जर स्टेडियममा खेलाइनेछ जसको फाइनल खेलेको मिति तय हुन् बाँकी छ। सिक्किम प्रिमियर लिगमा यसपल्ट थप एउटा टिम जोडिएको पछि टिम संख्या नौ पुगेको फुटबल डेभलपमेन्ट प्राइभेट लिमिटेडले जानकारी दिएको छ।
सिक्किम सरकारको खेल तथा युवा मामिला विभागको संरक्षण र सिक्किम फुटबल एसोसिएसनको तकनिकी सहयोगमा आयोजना गरिने सिक्किम प्रिमियर लिग फुटबलको लिग चरणमा ३६ वटा खेल हुनेछन् भने दुईवटा प्लेअफ र फाइनल गरी कूल ३९ म्याच हुनेछन्।
यस पल्ट देखि सिक्किम प्रिमियर लिगलाई अझ प्रभावकारी बनाउनका लागि खेलाडीहरूको डोप टेस्ट पनि शुरु गरिने आयोजकले जानकारी दिएको छ। राज्यमा कुनै पनि खेलमा डोप टेस्ट लागू गर्ने सिक्किम प्रिमियर लिग पहिलो प्रतियोगिता हुनेछ।प्रतियोगिता हेर्नका लागि यस सिजनदेखि टिकट व्यवस्था आयोजकले शुरु गरेको छ। व्यवसायिक फुटबल विकासका खेल टिकट काटेर हेर्नुपर्ने प्रथा स्थापित गर्ने सोच रहेको तर टिकट मूल्य भने साधारण सबैका लागि हुनेगरी तय गरिएको बताइएको छ।
About The Author
