Soongava Post
गान्तोक : सिक्किम मणिपाल विश्वविद्यालयअन्तर्गत सेन्ट्रल रेफरल अस्पताल (CRH) मणिपालले स्वास्थ्य सेवा वितरणलाई थप प्रभावकारी बनाउने उद्देश्यका साथ केयरएक्सपर्ट नामक अत्याधुनिक अस्पताल सूचना प्रणाली (HIS) र मोबाइल एप शुरु गरेको छ। केयरएक्सपर्टले अस्पतालको सञ्चालन प्रक्रियालाई अझ प्रभावकारी, बिरामीमैत्री र पेपरलेस बनाउने लक्ष्य राखेको छ।
आइतबार सिक्किम मणिपाल विश्वविद्यालयका उपकुलपति दिलिप चन्द्र अग्रवालले यो नयाँ सूचना प्रणालीको शुभारम्भ गरे।
यस प्लेटफर्ममा विद्युतीय स्वास्थ्य अभिलेख (EMR), अनलाइन समय तालिका व्यवस्थापन, फार्मेसी व्यवस्थापन, टेलिमेडिसिन सेवा लगायतका विशेषताहरू उपलब्ध छन्, जुन प्रयोगमैत्री मोबाइल एपमार्फत पहुँच गर्न सकिन्छ। बिरामीहरूले अनलाइन समय लिने, भुक्तानी गर्ने, भर्ना प्रक्रिया पूरा गर्ने र कागजातहरू बुझाउने सुविधा प्रयोग गर्न सक्नेछन्, जसले सेवा लिने क्रममा प्रतीक्षा समयलाई धेरै घटाउने बताएको छ ।
केयरएक्सपर्टमार्फत बिरामीहरूले आफ्नो स्वास्थ्य अभिलेख, प्रयोगशाला रिपोर्ट, र अन्य निर्धारित सुविधा सजिलै आफ्नै स्मार्टफोनमा हेर्न सक्नेछन्। यस एपले टाढामा रहेका बिरामीलाई परामर्शको सुविधा पनि प्रदान गर्ने भएकाले सुदूर क्षेत्रमा बसोबास गर्ने वा आवागमन गर्न कठिन हुने बिरामीहरूका लागि विशेष उपयोगी हुनेछ।
CRH का स्वास्थ्यकर्मीहरूलाई डेटा व्यवस्थापन सुधार, प्रशासनिक त्रुटि कमी, र बिरामी सेवाको गुणस्तर अभिवृद्धिमा केयरएक्सपर्टले ठूलो सहयोग पुर्याउने अपेक्षा गरिएको छ।
About The Author
